
ثريا وقفت وراه، وبصت لهدير بنظرة انتصار، كأنها بتقول لها: شوفتي؟ أنا اللي بكسب في الآخر.
هدير بلعت وجعها وسكتت، وراحت تكمل الفطار، لكن من اليوم ده ثريا بدأت تزود طلباتها يوم بعد يوم.
مرة تصحى تقول إنها عايزة محشي، ومرة تطلب فراخ محشية ورز معمر، ومرة ترفض الأكل كله وتقول إنه مش على مزاجها، وتخلي هدير تدخل المطبخ من أول وجديد.
ولو هدير اتأخرت أو تعبت، كانت ثريا تروح لصلاح وتشتكيله، وهو بدل ما يحط حد لمراته، كان ييجي على هدير ويزعق فيها.
والأصعب من الأكل والشغل، إنها بدأت تستغل ولادها كانت ترمي عيالها عند هدير من الصبح، وتسيبهم لحد آخر الليل، ولو طفل عيط أو طلب حاجة، كانت هدير هي اللي تشيله وتهديه وتاكله، بينما ثريا قاعدة في أوضتها بتتفرج على التلفزيون أو خارجة مع صلاح.
وفي يوم، ابن هدير الصغير سخن جدًا، وكانت هدير طول الليل صاحية جنبه، بتعمل له كمادات وتحاول تنزل حرارته، ولما الصبح طلع، لقت ثريا واقفة على باب أوضتها وبتقول لها:
– هدير، أنا عايزة منك تعملي الغدا بدري النهارده، عشان صلاح وعدني يخرجني، ومش عايزة أتأخر عليه.
هدير كانت عينيها حمرا من السهر، فقالتلها:
– مش هقدر النهارده، ابني تعبان وأنا لازم آخده للدكتور.
ثريا عقدت حواجبها وقالت:
– وإيه علاقة ده بالغدا؟ ما عندك عيال كتير، اتصرفي، وبعدين أنا ماليش دعوة بابنك تعبان ولا سليم، أنا عايزة أكلي في معاده.
هدير بصتلها بذهول:
– إنتِ بتتكلمي بجد؟ ابني سخن من امبارح، وأنا ما نمتش، وإنتِ كل اللي شاغلك الغدا والخروجة؟
ثريا ردت ببرود:
– أيوه، لأن دي حياتي، ومش هعطلها عشان كل شوية حد من عيالك يمرض.
هدير ما استحملتش، ودخلت أوضتها وقفلت الباب، وفضلت تبكي وهي باصة لابنها اللي نايم بتعب.
كانت محتاجة حد يطبطب عليها، حد يقول لها إنه حاسس بيها، لكنها للأسف كانت عايشة وسط ناس شايفين تعبها واجب، ووجعها دلع، وحقوقها حاجة ممكن تتنازل عنها في أي وقت.
ولما صلاح رجع من بره، ثريا استقبلته بوش حزين، وقالت له إن هدير قفلت الباب في وشها ورفضت تعمل الغدا، وإنها بتتعمد تبوظ عليها يومها.
صلاح دخل على هدير من غير ما يسأل حتى عن ابنه، وصرخ فيها:
– إنتِ إيه اللي إنتِ بتعمليه ده؟ هو كل يوم مشكلة؟ مش قولت لك تساعدي ثريا وتراعيها؟
هدير كانت قاعدة جنب ابنها، رفعت عينيها له وقالت بصوت مبحوح:
– ابني تعبان يا صلاح، حرارته عالية من امبارح، وأنا عايزة آخده للدكتور. إنت حتى ما سألتش عليه!
بص صلاح ناحية الطفل للحظة، وبعدها رجع لها وقال:
– هوديه للدكتور لما أفضى، إنما دلوقتي قومي اعملي الغدا، أنا مش ناقص صداع.
هدير قامت من مكانها ببطء، وبصت له كأنها بتشوفه لأول مرة، وقالت:
– إنت بقيت إيه يا صلاح؟ إنت أبو عيالي، المفروض تكون سند لينا، مش تيجي عليّ عشان ترضي واحدة تانية. أنا مش طالبة منك تحبني، ولا حتى تعاملني زي الأول، أنا كل اللي بطلبه إنك تسيبني أربي عيالي في سلام.
صلاح اتعصب من كلامها، وهم بإيذائها، لكن هدير المرة دي رجعت لورا وحضنت ابنها، وقالت له بصوت عالي:
– إوعى تؤذيني تاني يا صلاح! أنا سكت كتير، وسكوتي مش معناه إني ضعيفة، ولا معناه إنك تقدر تعمل فيا اللي إنت عايزه.
صلاح اتفاجئ من رد فعلها، لأنه اتعود إنها تعيط وتسكت، لكنه ما حبش يبان إنه اتراجع قدامها، فقال بتهديد:
– إنتِ بتتحديني يا هدير؟ طب والله لأخليكي تندمي على اليوم اللي فكرتي فيه تعلي صوتك عليّ.
خرج من الأوضة، وثريا كانت واقفة بره وسمعت كل حاجة، فابتسمت لنفسها، لأنها أخيرًا بدأت تشوف هدير بتنهار، لكن في نفس الوقت خافت من حاجة واحدة: إن هدير لو فضلت ساكتة، ممكن في يوم تفوق وتطالب بحقوقها.
عشان كده، قررت ثريا إنها تسرّع خطتها، وبدأت تزن على صلاح إنه لازم يخلي هدير تسيب البيت، بحجة إن وجودها بقى مصدر مشاكل وإن العيال محتاجين يعيشوا في هدوء.
وفي ليلة، بعد ما صلاح رجع من خروجة طويلة مع ثريا، لقى هدير قاعدة في الصالة، وحواليها ورق العيال وأوراق المدرسة، وكانت بتحاول تحسب مصاريفهم اللي بقت مش مكفية بسبب إن صلاح بدأ يقلل الفلوس اللي بيديها لها، وفي المقابل بقى يصرف على ثريا من غير حساب.
قعد قدامها وقال ببرود:
– بصي يا هدير، أنا تعبت من المشاكل دي، وإنتِ مش عايزة تتأقلمي مع الوضع الجديد، وأنا شايف إن الأحسن إنك تشوفي لك مكان تاني تعيشي فيه.
هدير رفعت راسها ببطء، وحست إن الكلام اللي كانت خايفة تسمعه طول الشهور اللي فاتت بقى حقيقة.
قالت له:
– مكان تاني؟ يعني إيه يا صلاح؟ عايزني أسيب بيتي وبيت عيالي وأمشي؟
رد من غير ما يبصلها:
– أيوه، البيت بقى ملكنا إحنا الاتنين، وثريا مش مرتاحة في وجودك، وأنا مش هفضل كل يوم في مشاكل بسببك.
هدير ضحكت ضحكة قصيرة مليانة قهر، وقالت:
– بيتنا إحنا الاتنين؟ إنت نسيت إنك كنت متجوزني قبليها بسنين؟ نسيت إن عيالك اتولدوا واتربوا هنا؟ ولا عشان فتحت الشقتين على بعض، بقيت فاكر إنك تقدر تمسح عمري كله بكلمة؟
صلاح اتضايق وقال:
– بلاش الكلام الكبير ده، أنا بقول لك اللي فيه مصلحتك، خدي عيالك وروحي عند أهلك لحد ما نشوف هنعمل إيه.
هدير قامت ووقفت قدامه، ولأول مرة ما نزلتش عينيها في الأرض.
– أنا مش همشي من بيتي يا صلاح، ولو إنت شايف إنك مش عايزني، فيه قانون وفيه حقوق، وأنا مش هسيبك تضيّع حقي وحق عيالك عشان واحدة قدرت تسيطر على عقلك.
الكلام نزل عليه كالصاعقة، لأنه ما كانش متخيل إن هدير اللي سكتت كل السنين دي ممكن تقف قصاده بالشكل ده.
أما ثريا، اللي كانت بتسمع من ورا الباب، فوشها اتقلب، لأنها فهمت إن اللعبة اللي كانت فاكرة إنها كسبتها خلاص، لسه ما انتهتش، وإن هدير اللي كانت بتعاملها على إنها خدامة، ممكن تبقى أكبر عقبة في طريقها.
ومن هنا بدأت ثريا تفكر في طريقة تانية، مش بس عشان تطرد هدير من البيت، لكن عشان تخلي صلاح نفسه هو اللي يكرهها ويجبرها تمشي بإرادتها… من غير ما تحتاج هي تطلب منه ده مرة تانية




