واية: الجاكيت الأخضر… سر اختفاء ابني
الجزء الأول: الطفلان اللذان عادا من الماضي
بقلم الكاتبة أسما السيد – حصري
لقيت طفلين توأم لسه مولودين، ملفوفين في نفس الجاكيت اللي كان لابسه ابني الوحيد يوم ما اختفى من تلات سنين… لكن الصدمة الحقيقية كانت لما لقيت جواب مستخبي في جيب الجاكيت، وأول ما قريت اللي مكتوب فيه، انهرت من العياط!
مكنتش أعرف إن الطفلين دول هيكونوا السبب في كشف سر اختفاء ابني، ولا إن أقرب الناس لينا كان مخبي حقيقة مرعبة طول السنين دي.
اسمي نادية، عندي تسعة وأربعين سنة، وأرملة من يوم ما جوزي مات وسابلي يوسف، ابني الوحيد، وهو عنده اتناشر سنة.
من يومها وأنا عايشة علشانه.
كنت أمه وأبوه وصاحبته، وهو كان سندي وضهري وكل اللي باقيلي من الدنيا.
يوسف كان شاب جميل وهادي، عيونه عسلي، وشعره أسود، وضحكته كانت كفيلة تنسيني تعب يوم كامل.
كان دايمًا يقولي:
— يا ست الكل، أول ما أتخرج وأشتغل، هجيبلك بيت كبير، وهخليكي تعيشي ملكة.
وأنا أضحك وأرد:
— أنا مش عايزة منك غير أشوفك مبسوط يا حبيبي.
كان يضحك ويحضني:
— ما أنا مش هبقى مبسوط غير لما أشوفك مرتاحة.
لكن في يوم واحد، كل أحلامنا اختفت.
كان صباح شتوي برده شديد، ويوسف قاعد على ترابيزة المطبخ بيفطر بسرعة.
قلتله:
— بالراحة يا يوسف، هتشرق يا ابني!
ضحك وهو بيشرب الشاي:
— معلش يا ماما، عندي مشوار مهم ولازم ألحقه.
سألته:
— مشوار إيه بدري كده؟
اتردد لحظة، وبعدين قال:
— هقابل حد في موضوع مهم، ولما أرجع هحكيلك.
ابتسمت:
— حد مين يا سيدي؟ إنت مخبي عليا حاجة؟
وشه احمر شوية، وضحك:
— قريب هتعرفي كل حاجة يا ست الكل.
مكنتش أعرف إن الجملة دي هتفضل تطاردني تلات سنين.
خلص فطاره، وخد شنطته، ولبس الجاكيت الأخضر الغامق اللي كنت جايباهوله في عيد ميلاده.
قبل ما يخرج ناديته:
— يوسف! اقفل سوستة الجاكيت، الدنيا برد جدًا بره.
لف وبصلي بابتسامة:
— حاضر يا ماما، متقلقيش.
قرب وباس راسي، وقال:
— خلي بالك من نفسك لحد ما أرجع.
رديت:
— ربنا يحفظك يا ضنايا.
وخرج.
وكانت دي آخر مرة أشوفه فيها.
الساعة بقت اتنين الضهر، وبعدين خمسة، وبعدين تسعة بالليل.
يوسف مرجعش.
اتصلت عليه، تليفونه مقفول.
في الأول قلت يمكن البطارية فصلت.
كن لما الساعة عدت اتناشر، قلبي بدأ يتقبض.
اتصلت بصاحبه عمر.
— ألو يا عمر، يوسف معاك؟
رد باستغراب:
— لا يا طنط، أنا مشوفتوش من امبارح.
— طب تعرف راح فين؟
— لا والله، هو فيه حاجة؟
حاولت أتماسك:
— لا يا حبيبي، بس اتأخر شوية.
قفلت، وبدأت أتصل بباقي أصحابه.
محدش شافه.
الفجر طلع، وابني لسه مرجعش.
نزلت الشارع وأنا شبه المجنونة.
روحت القسم، وعملت محضر اختفاء.
الضابط سألني:
— عنده مشاكل مع حد؟
— لا يا باشا، ابني مالوش في المشاكل.
— كان متضايق من حاجة؟
— أبدًا، ده كان بيضحك وهو خارج.
— ممكن يكون سافر من غير ما يقولك؟
بصيتله بوجع:
— يوسف عمره ما بات بره البيت من غير ما يكلمني. حتى لو اتأخر ساعة، كان بيتصل يطمني.
بعد يومين، الشرطة لقت عربيته مركونة على طريق زراعي بعيد عن البيت.
العربية كانت مقفولة، ومفيهاش أي آثار واضحة تدل على اللي حصل.
لكن يوسف مكنش فيها.
ولا تليفونه.
ولا شنطته.
كأنه اتبخر من الدنيا.
الشرطة دورت، وسألت، وحققت مع أصحابه.
وأنا كنت بروح كل مكان حد يقولي إنه شاف فيه شاب شبه يوسف.
مرة سافرت محافظة تانية علشان واحد قال إنه شافه في محطة القطر.
ولما وصلت، اكتشفت إنه شاب تاني.
رجعت البيت يومها وقعدت على الأرض قدام أوضته، وفضلت أعيط لحد ما صوتي راح.
كان فيه شخص واحد بيقف جنبي طول الوقت.
عادل، أخو جوزي المتوفي.
كان راجل عنده حوالي خمسة وخمسين سنة، وصاحب شركة مقاولات، وحالته المادية كويسة.
كان بييجي يطمن عليا، ويجيبلي طلبات البيت، ويقولي:
— اصبري يا نادية، ربنا كبير.
كنت بقوله:
— يا عادل، أنا حاسة إن يوسف عايش.
يرد وهو بيتجنب عيني:
— إن شاء الله يرجعلك بالسلامة.
ومرت الأيام.
شهر ورا شهر.
وسنة ورا سنة.
لحد ما عدت تلات سنين كاملة.
تلات سنين وأنا مش عارفة ابني عايش ولا ميت.
كنت كل ليلة أدخل أوضته، وأفتح دولابه، وأشم ريحة هدومه.
أمسح التراب عن كتبه، وأرتب سريره، وأحط إيدي على مخدته.
وأقوله كأنه سامعني:
— وحشتني يا يوسف… أنا مستنياك يا حبيبي.
الناس بدأت تقول إني لازم أتقبل الواقع.
لكن إزاي أم تتقبل إن ابنها اختفى من غير ما تعرف مصيره؟
كنت برفض أغير أي حاجة في أوضته.
حتى الكوباية اللي كان بيشرب فيها الشاي، فضلت محتفظة بيها.
