أنا جوزي اتوفى ليلة الفرح، وكانت صدمة العمر اللي دمرت كل حاجة جوايا. من كتر الصدمة، بقى جوايا طاقة غضب كبيرة تجاه كل أصحابه؛ كنت عايزة أتخلص منهم ولو بإيدي، واتهمتهم علناً قدام الشرطة إنهم السبب عشان أقنعوه يتعاطى الممنوعات، لكن في النهاية الطب الشرعي قال كلمته خلاص: جوزي اتوفى ومفيش أي شبهة جنائية، مات عشان ياخد قلبي معاه ويحول أجمل ليلة في العمر لكابوس هيلازمني طول عمري.
وعشان مينفعش أخرج من شقة الزوجية قبل الأربعين، قررت أفضل فيها لوحدي عشان أشوف كل أركان الشقة، وأفتكر كل عهد وكل كلمة كنا متفقين نعملها بعد الجواز. بعد تلت ليالي من الحزن والوجع الشديد لدرجة إني روحت المستشفي مرتين، وفي الليلة الرابعة وأنا بحاول أنام لأني مكنتش بنام تقريباً، سمعت صوت حركة مفاتيح على باب الشقة! قمت من مكاني وأنا حاسة بتوتر غير طبيعي، وقلبي بيدق بسرعة كأنه هيطلع من صدري.
اتحركت بهدوء ناحية الصالة ووقفت ورا باب الشقة، ولمحت ضل شخص واقف بره. وفي لحظة، لقيت ورقة مطوية بتدخل من تحت الباب، وبيتحرك صاحب الظل ويمشي. فضلت مستغربة ومذهولة رغم إن الخوف كان متمكن مني. قربت من الورقة وفتحتها وقريت اللي فيها: «اجهزي يا حبيبتي عشان هنتجوز قريب.. معلش هنأجل الدخلة عشان أنا مت، بس هرجعلك تاني قريب أوي».
الكلام ده خلى جسمي كله يقشعر! مين السخيف اللي ممكن يعمل مقلب زي ده وفي ظروف زي دي؟ بس اللي لفت نظري وكان مرعب أكتر، إن ده كان خط جوزي بالظبط! فتحت أوراق قديمة كان بيكتبهولي قبل كده، ولقيت إن ده نفس الخط تقريباً. يعني اللي بيعمل المقلب السخيف ده شخص قريب منه أوي وعارف خطه!
وتاني يوم، حكيت الموضوع لصاحبتي المقربة “حنان”، ولقيتها طمنتني وقالتلي: «أكيد ده مقلب سخيف من حد بيرخم، ولازم تتعاملي معاه بتجاهل تام عشان الأمور تمشي وماتديش للناس دي فرصة». وفعلاً، قررت أتجاهل الموضوع عشان يتكرر معايا تاني ليلة، وبنفس التفاصيل تقريباً: نفس صوت المفاتيح، أشوف الظل واقف، وبعدها الورقة تترمي من تحت الباب. المرة دي كان مكتوب فيها الآتي: «حبيبتی هانت، ونبق مع بعض ومفيش حاجة هتقدر تفرقنا».
فكرت أتشجع وأفتح الباب وأشوف مين اللي بيبعت الورق ده، بس الخوف منعني واحتفظت بالورقة للمرة التانية. المرة دي بدأ الخوف يغزو قلبي ومبقتش عارفة أنا ممكن أتصرف إزاي، لحد ما اتكرر الموضوع في الليلة التالتة. أول ما اترمت الورقة، مقدرتش أتمالك أعصابي، وقررت أفتح الباب وأشوف مين اللي بيعمل الحركة دي.
وفي ثانية واحدة، لمحت حد نازل على السلم، حد لابس كفن أبيض وعليه أتربة كتير ومش ظاهر منه أي حاجة تانية! اللي شوفته خلاني أتسمر مكاني وأفتح عينيا على آخرها. وفين وفين على ما قدرت أدخل مرة تانية للشقة وأقفل الباب. فتحت الورقة برعب، لقيت مكتوب فيها: «هستناكي قدام التربة اللي اتدفنت فيها بعد نص الليل.. أوعى تتأخر، تلت أيام بالعدد».
وقتها بس، مكنش ينفع أفضل في الشقة دي مهما حصل، وقرت أسيبها وأرجع بيت أخويا. قعدت هناك يومين، ومن تالت يوم بدأت مراته ترمي كلام جارح وتفتعل مشاكل عشان أمشي؛ وده ببساطة لأني كنت خدت نصيبي في ورث أبويا بعد ما اتباع وجهزت نفسي بيه، ومبقاش ليا مكان دائم أعيش فيه غير شقة جوزي. عشان كده، رجعت في الليلة التالتة غصب عني، رجعت عشان أتفاجئ إن الشقة كلها مقلوبة وكأنها اتسرقت، ومفيش أي حاجة في مكانها الطبيعي.
