لجزء الثالث والأخير
فضلت باصة لنادية وأنا مش مستوعبة الجملة اللي قالتها.
— أخوكي… كان في بيتنا ليلة ما أمي تعبت؟
نادية ما ردتش.
أبويا هو اللي انفجر فيها:
— إنتِ اتجننتي؟! ليه بتفتحي الكلام ده دلوقتي؟
لفيت له بسرعة.
— يعني إنت كنت عارف؟
سكت.
قربت منه.
— بابا… إنت كنت عارف إن أخوها كان موجود؟
قال بعصبية:
— سلمى، الموضوع قديم ومش زي ما إنتِ فاهمة.
ضحكت.
مش ضحكة فرح.
ضحكة واحدة خلاص بقت كل إجابة تسمعها تفتح قدامها مصيبة أكبر.
— من امبارح وكل حاجة “مش زي ما أنا فاهمة”! طب فهموني بقى!
نادية قعدت على الكنبة.
لأول مرة من ساعة ما عرفتها، شوفتها مش مسيطرة على نفسها.
إيديها كانت بتترعش.
أبويا قال:
— محدش هيتكلم لحد ما أعرف أخوكي عايز إيه.
— هو راجع.
— راجع منين؟
— كان بره البلد.
— وإنتِ كنتِ بتكلميه؟
نادية ما ردتش.
صرخت:
— نادية!
رفعت عينيها له.
— كل فترة.
أبويا مسك راسه.
وأنا واقفة بينهم حاسة إني بتفرج على اتنين عندهم حياة كاملة من الأسرار وأنا الوحيدة اللي ما تعرفش حاجة.
قلت:
— أنا ماشية.
أبويا وقف قدام الباب.
— على فين؟
— القسم.
— قسم إيه؟
رفعت صورة الورقة.
— أبلغ عن تزوير توقيعي.
نادية قامت بسرعة.
— استني.
بصيتلها.
— على إيه؟ على كدبة جديدة؟
— التوقيع أنا اللي عملته.
الصالة كلها سكتت.
أبويا لف لها ببطء.
— إيه؟
قالت وهي باصة في الأرض:
— أنا اللي مضيت مكانها.
أبويا قرب منها.
— إنتِ قولتيلي المحامي قال إن ده إجراء مبدئي!
— وأنا كدبت عليك.
اتجمدت وأنا ببص لأبويا.
— يعني إنت ماكنتش تعرف؟
رد بسرعة:
— أقسم بالله ما كنت أعرف إن فيه ورقة اتقدمت بتوقيعك.
قلت:
— بس كنت عايزني أمضي على التنازل الحقيقي.
سكت.
— يبقى متعملش نفسك بريء.
الجملة وجعته.
بان على وشه.
لكن المرة دي ماهمنيش.
بصيت لنادية.
— ليه زورتي توقيعي؟
قالت:
— علشان كنت عايزة أرجع حق أبويا.
— بالطريقة دي؟
— لما قضيت سنين بحاول، ومحدش رضي يسمعني… أيوه.
قلت:
— والمحامي؟
— كان فاكر إن التوقيع توقيعك.
— يعني إنتِ لوحدك اللي زورتيه؟
سكتت لحظة.
— أيوه.
قلت:
— تمام.
طلعت موبايلي.
— الكلام ده هيتقال قدام النيابة.
أبويا قرب مني.
— سلمى، استني.
— أبعد يا بابا.
— هنحل الموضوع بينا.
بصيتله.
— بينا؟
وأشرت لنادية.
الست دي زورت إمضتي علشان تاخد ملكي وإنت عايز نحلها بينا؟
قال:
— لو عملتي بلاغ، الموضوع هيكبر.
— ما يكبر.
— نادية ممكن تدخل في قضية.
قلت من غير تردد:
— دي مش مشكلتي.
نادية ضحكت بسخرية.
— شايف يا محمود؟
لفيت لها.
— شايف إيه؟
— أهو ده اللي كنت بقولهولك. أول ما تعرف إن معاها فلوس هتدوس على أي حد.
مشيت ناحيتها.
— أنا بدوس على مين؟ اللي زورت توقيعي؟ ولا اللي رمت كتبي وقالتلي إني عالة وهي أصلًا عايشة في بيت بيتصرف عليه من فلوس أمي؟
وشها احمر.
— خليكي في أمك.
— لأ، مش هخليها. إنتِ اللي دخلتيها في كل حاجة.
قربت منها وقلت:
— ومن دلوقتي اسم أمي ما يطلعش من بوقك غير باحترام.
قبل ما ترد…
جرس الباب رن.
كلنا اتجمدنا.
نادية بصت لأبويا.
— هو.
أبويا راح ناحية الباب.
— محدش يتكلم غيري.
فتح.
كان فيه راجل في أواخر الأربعينات تقريبًا.
شعره فيه خصل بيضا، ووشه مرهق، وشايل شنطة سفر صغيرة.
أول ما دخل، عينه وقعت عليا.
فضل باصصلي فترة طويلة.
طويلة زيادة عن الطبيعي.
قال:
— دي سلمى؟
نادية قالت:
— أيوه يا حسام.
ابتسم ابتسامة حزينة.
— كبرتي.
بصيتله.
— إنت تعرفني؟
قال:
— آخر مرة شوفتك كان عندك 13 سنة.
حسيت بقشعريرة.
— ليلة ما أمي ماتت؟
ملامحه اتغيرت.
نادية قالت:
— حسام، بلاش دلوقتي.
لف لها.
— إنتِ اللي قولتيلي لازم أرجع.
أبويا قال:
— رجعت ليه؟
حسام حط شنطته.
— علشان عرفت إن نادية بتحاول تاخد العمارة.
نادية صرخت:
— دي حقنا!
بصلها.
— لأ.
قالتها بمنتهى الهدوء.
نادية اتجمدت.
— إنت بتقول إيه؟
— بقول العمارة مش حقنا.
— أبوك دفع فيها!
— دفع جزء من تمن الأرض كشريك.
بصيت له.
— يعني أبوك كان شريك أمي فعلًا؟
— كان.
— وبعدين؟
تنهد.
— المشروع خسر في البداية، وأبويا احتاج فلوس، فباع حصته لوالدتك.
نادية صرخت:
— كداب!
حسام فتح شنطته.
طلع ملف.
— كنت عارف إنك هتقولي كده.
حط ورقة على الترابيزة.
— عقد التنازل الأصلي.
نادية خطفته.
بدأت تقرأ.
وشها اتغير مع كل سطر.
قالت:
— مستحيل.
— توقيع أبويا قدامك.
— ليه ما شوفتش الورقة دي قبل كده؟
— لأنك ما دورتيش على الحقيقة. إنتِ دورتي على الورق اللي يثبت اللي إنتِ عايزاه.
نادية قعدت.
كأن رجلها ما بقتش شايلها.
أما أنا…
فكان عندي سؤال أهم.
— أمي كانت تعرف أبوك إزاي؟
