ابوي واختي الصغيره الاول
من 15 سنة أمي قالت إنها شافت أبويا بيزعق لاختي الصغيرة بقسوة ومن وقتها وهي في مستشفى نفسي، لحد ما روحت لها في يوم أقنعها تغير كلامها بس ما صرختش ولا انهارت زي ما بتعمل، مسكت إيدي ورسمت علامة صغيرة وغريبة خلتني أنا اللي صرخت ومقدرتش أوقف دموعي!!!!!
15 سنة وأنا بحاول أستوعب اللحظة اللي حياتنا فيها اتغيرت تماماً.
كنت وقتها عندي يادوب 12 سنة، طفلة كل همها في الدنيا ألعابها، ومدرستها، والضحكة اللي ما بتفارقش بيتنا. كان بيتنا دايماً مليان دفا. أمي وأبويا كانوا بيحبوا بعض بشكل كل الناس بتحسدهم عليه. أبويا فعلا كان راجل ملتزم وخلوق كل العيلة بتحبه، وأمي كانت هي الأمان والضحكة الصافية اللي منورة دنيتنا. كل حاجة كانت تمام، لحد ما في ليلة صعبة جداً، كل الحب والدفا ده اتهز في ثواني.
صحيت في نص الليل على صوت عالي. الصوت جاي من الصالة، صوت أمي وهي بتبكي. جريت طلعت من الأوضة، شوفت منظر عمري ما هنساه… أمي ماسكة في هدوم أبويا، بتعيط بكل قوتها، وبتقول بصوت مخنوق من كتر العياط: “دي بنتك الصغيرة إزاي تعمل كده؟ إزاي تزعق لها كده؟!”
أنا وقفت في مكاني، جسمي كله بيترعش، الخوف تملكني وقلت بصوت بيترعش: “فيه ايه يا ماما؟ مالك؟”
بصت لي بعيون مليانة خوف وقالت لي: “اتصلي بخالك بسرعة يا نسمة! خليه يجي يشوف حل، أنا مش هسكت!”
أبويا كان واقف مذهول، وشه أصفر، إيديه بترتعش وهو بيحاول يمسكها ويقرب منها ويقول بقلة حيلة: “اهدي يا مديحة.. اهدي يا حبيبتي! يمكن شوفتي حلم؟ أنا كنت طالع أشرب مية ومايا في أوضتها نايمة.. معقولة أعمل كده في بنتي؟”
جريت على أوضة اختي مايا، لقيتها فعلا في سابع نومة، ما حستش بأي حاجة من اللي بتدور برة. رجعت أتحايل على أمي، بس كانت فاقدة تركيزها تماماً، مش سامعة حد.
على الصبح، البيت اتملى بأهلنا. كل العيلة اتجمعت، وأمي منهارة وبتحاول تقنعهم وهم بيحاولوا يهدوها ويفهموها إنها غلطانة، إن ده مستحيل. أبويا كان بالنسبة للكل مثال للرجل المستقيم، الخلوق، الأب اللي مفيش منه اثنين. محدش كان قادر يصدق ايه اللي يخلي ست متجوزة راجل زي ده تتهمه اتهام بالشكل ده! بس هي كانت بتصرخ في وش الكل: “أنا شوفت بعيني! والله ما هسكت!”
ومن اليوم ده، حياتنا اتقلبت رأساً على عقب. أمي دخلت مستشفى الأمراض النفسية، وأنا -البنت اللي مكملتش 12 سنة- لقيت نفسي فجأة مسؤولة عن بيت كامل، وعن أخت صغيرة يادوب عندها عشر سنين. بقيت أنا الأم وأنا أختها الكبيرة. بقيت أنام جنبها كل ليلة، آخدها في حضني وأحاول أسكت دموعها وهي بتبكي كل يوم بالليل عايزة أمها. أبويا رفض تماماً إنه يتجوز تاني، رفض يجيب لنا زوجة أب، كان دايماً حنين معانا، يخدمنا ويراعينا، ووشه دايماً شايل حزن كبير على مراته اللي تعبت فجأة.
كنا عايشين في مأساة حقيقية. كل ما نحاول نروح نزورها في المستشفى، أول ما تشوف أبويا تصرخ وتتضايق، فالأطباء نصحوا إن أبويا يبطل يزورها خالص ويتابع حالتها من بعيد. وبمرور الوقت، أنا وأختي كمان بطلنا نروح، المكان كان صعب بالنسبة لنا كأطفال، وأبويا ما كانش بيأمن يودينا مع حد غيره.
عدت السنين، أربعطاشر.. خمسطاشر سنة وأنا كبرت. وكل ما أمي كانت تبدأ تتحسن، ييجي الدكتور وهو مقرر خلاص يكتب لها خروج، ويسألها عن ليلتها الأخيرة في البيت، تنهار تاني وتصرخ وتكرر نفس الكلام، فيجددوا لها الإقامة في المستشفى.
بعد 15 سنة، كبرت واتعرفت على شاب محترم عن طريق الشغل، ودخل بيتنا وخطبني وهنتجوز. في اللحظة دي حسيت إن فيه حاجة ناقصة.. أمي لازم تكون معايا، لازم تطلع تحضر فرحي. قررت إن لازم أروح أزورها لوحدي، من غير أبويا ومن غير أختي، وأحاول أصلح اللي حصل من سنين.
رحت لأبويا وطلبت منه أزورها لوحدي. وافق بصعوبة شديدة وبعد تحايل كبير، وكان خايف عليا، بس في النهاية وافق.
دخلت عليها المستشفى… المكان كان كئيب، والريحة تقيلة، بس أول ما شوفتها قلبي اتعصر. كانت كبرت وشاب شعرها، بس لسة فيها حاجة من أمي بتاعة زمان
أول ما شافتني وقفت والدموع ملت عيونها عرفتني فوراً رغم إني كبرت واتغيرت.. عرفتني مع إني أنا نفسي بالعافية اتعرفت عليها… قالت وصوتها بيترعش… نسمة
ابتسمت بدموع وجريت حضنتها قلت لها أيوه أنا نسمة يا حبيبتي وحشتيني… وحشتيني يا ماما
أمي بقت تحضني بلهفة وسألت عني وعن مايا وكأن مفيهاش أي حاجة لحد ما مسكت إيدها وبدأت أعرض عليها العرض اللي جيت علشانه.
قلت لها بصوت هادي وبترجي: “يا ماما.. عشان خاطري، قولي للدكاترة إنك بقيتي كويسة، ولو سألوكي عن اليوم ده، قولي لهم خلاص.. أنا كنت فاهمة غلط، كان حلم وسوء فهم وخلاص عدى. اعملي كده عشان تخرجي وتكوني معايا في فرحي!”
أمي بصت بحدة وقالت: “بس أنا مش فاهمة غلط يا نسمة! أنا شوفته!”
أنا خفت تروح في نوبة الصراخ العادية والدكاترة يجوا، فرديت عليها بسرعة وبلهفة عشان أهديها: “عارفة يا ماما.. عارفة، بس احنا هنقول كده للدكاترة عشان يوافقوا يخرجوكي وترجعي لنا البيت!”
هنا… حصل أغرب حاجة في حياتي.
أمي صمتت فجأة.. ما صرختش، ولا انهارت، ولا جتلها حالة زي اللي متعودين عليها كل سنة.
بصت لي بنظرة غموض وابتسمت ابتسامة هادية جداً. قربت مني، ومسكت إيدي اليمين بالراحة، وفتحت كفي… وكان جنبها ورقة وقلم بتشخبط فيهم وتتسلى، مسكت القلم ورسمت على بطن إيدي علامة صغيرة وغريبة جداً.
أول ما عيني وقعت على العلامة دي، واستوعبت أمي بتعمل إيه وبترسم لي إيه… أنا اللي حسيت بانهيار وصرخت بقوة ودموعي نزلت زي المطر بشكل هستيري، ما قدرتش أوقفها…
